* * *
Бодунуң эриин үерлээн
хем
Боду-ла үрей шаап
аар ийин.
Боттуң кылыы оон-даа
дора.
* * *
Селбер бажың дөңгүрерткеш,
эреге чууп,
Сен-даа дыка
ыдык-чаагай көстүп тур сен.
Сеткилиң чоп
биеэги-ле хевээр чүвел?
* * *
Ырак оран Энеткекче
каш-даа
удаа
Ыдык номнал
суртаалынга чорааш келдиң.
Ынчалза-даа...
* * *
Даштыкы хөлге
мунупканда,
Дарга олут
ээлепкенде,
Талаң мени танывас
сен ийин.
* * *
Эрге-дужаал, көвей
акша эдилээнде
Эки кижи үрелир-деп
меге ийин –
Чаштып чораан шыны көстүп
келгени ол.
* * *
Адааргалдың
чалбыыжынга хуюкталган
Арны-бажың, ишти-хөңнүң
кээргенчиг бол,
Пашта хоорган күскең
чүден кээргенчиг-дир.
* * *
"Сээдең сен!” – деп
чалымдыва алгырарга,
Сеңээ чалым: "Сээдең
сен!” – деп харыылап бээр.
Баък үүле ээзинге-ле
ээп кээр ийин.
* * *
Оо-хоран үрезинин
тарып аарга,
Оон чүгле хоран өзүп
келири дег,
Нүгүлүң сээ чүгле
бачыт эккээр ийин.
* * *
Чежемейниң
шаар дээрже бедизе-даа,
Черден
эзир черле караан салбас ийин.
Төрээн
чериң, дазыл-угуң утпайн-на көр.
* * *
Арын-бажың
карак-кулааң көөрүмге,
Ада-иең
дөзеп алган тыва-даа бол,
Аксың чүге
орустап-ла турар чүвел?!